Schillmann 1644

.. episcopo Parisiensi.

Gravem dilectorum filiorum .. abbatis et conventus monasterii Fontis Johannis, Cisterciensis ordinis, Senonensis diocesis, accepimus questionem quod Geraldus, quondam ipsius monasterii abbas, nunc s. Benedicti ordinis monachus, prefatum monasterium, conventus ejusdem monasterii irrequisito consensu, pro viginti octo milibus librarum Turonensium et amplius diversis creditoribus personis secularibus obligavit; propter quod prefatum monasterium eam desolationem incurrit, quod in eo, in quo septuaginta consueverunt monachi Deo in divinis officiis deservire, vix tantum possunt in paupertate duodecim residere. Cum autem per eosdem creditores dicti abbas et conventus coram diversis executoribus a sede apostolica delegatis, diversimode adeo molestentur, quod nisi predicto monasterio sedis apostolice presidio celeriter succurratur, vix adiciet ut resurgat, prefati abbas et conventus nobis humiliter supplicarunt ut providere ipsis super hoc paterne diligentie studio curaremus. Cum igitur nostra intersit collapsis ecclesiis, qui omnium curam gerimus, non deesse, fraternitati tue per apostolica scripta mandamus quatinus, vocatis qui fuerint evocandis, tam litteras super hoc ad judices ipsos obtentas, quam processus earum auctoritate habitos, auctoritate nostra tibi faciens exhiberi, detentores earum ad id, si necesse fuerit, per censuram ecclesiasticam, appellatione postposita, compellendo, audias que partes coram te duxerint proponenda et si prefati creditores probare nequiverint predictam pecuniam eidem Geraldo de consensu conventus mutuatam, ac in ejusdem monasterii utilitatem conversam fuisse, licet super hoc prefati G., quondam abbatis, littere in judicium deducantur, prefatis creditoribus super eisdem pecuniarum summis perpetuum imponens silentium, eosdem abbatem et conventum ab eorundem super hoc impetitione absolvere non postponas. Non obstantibus –. Contradictores etc. Datum Viterbii, X kalendas octobris, anno I°.