Schillmann 1619

Magistro et conventui domus Militie Templi Jerosolimitani.

Habet universalis ecclesia in carissimo in Christo filio nostro .. rege Francorum illustri, unde in rege pro Christo Jesu canticis et ymnis exultet. Habent in ipso cujusque cultores unde Domini nomen in choro laudent ac tympano et psalterio psallant ei. Ipsius namque regis Francorum pectus piissimum, gratie celestis dono perfusum, sic ad cunctas orbis ecclesias et personas ecclesiasticas, religiosas precipue, ubertim ubera sue pietatis effundit ut ipsum experiatur cotidie omnis Christiana religio singulare presidium et precipuum sentiat libertas ecclesiastice munimentum. Vos autem in eo ad singularis jubili canticum causa singularis invitat. Si enim prudentius attenditis, si qua decet attentione notatis quanta idem Francorum rex ordinem vestrum et jura ipsius custodie diligentia protegit et quam diligenti protectione custodit, quantaque vos et cunctos ejusdem ordinis professores, caritatis singularitate prosequitur, profecto cogemini, exauditionis promptitudine loquente, fateri dignum fore, nec minus debitum, ut que a vobis nunc presertim cum vestrorum incremento profectuum et multi apud eum favoris augmento dignanter exposcit, liberaliter consequatur. Ecce etenim litteris ad vos de novo directis vobis et eidem ordini vestro, nova et aperta sue affectionis exhibet argumenta, preceptorie officium in regno suo illi postulans persone committi, cui et idem rex de ipsius fidei sinceritate ac probitate confidens, confidenter pia secreta committat. Ad quod dilectum filium fratrem Amalricum de Rupe, ipsius ordinis, virum utique providum et consilii maturitate conspicuum, sibi ex antiqua familiaritatis notitia predilectum, sicut hujusmodi ejus manifestat electio, preelegit, apud nos nichilominus et fratres nostros variis instando litteris, et rogando nos ipsos instanter ut vobis super hoc efficaciter scriberemus. Et quidem, licet, dum magnitudinem et affectum vos super hoc tam affectuose rogantis attendimus, dum ipsius rogamina causamque consideramus eorum, illa nec immerito reputemus sufficere ad obtinenda petita nobisque proinde certe spei verisimilitudo, immo verisimilitudinis ratione suffulte certitudo succrepat, ea per vos in liberalitatis promptitudine admittendo, quia tamen de memorato fratre, meritis sue probitatis, quorum plenam per familiarem experientiam obtinemus, inspectis, plene confidimus, quia ejus ministerio pro nostris et ecclesie Romane negotiis in partibus Francie plurimum indigemus, et illo sub prudentie ac fidelitatis sue fiducia uti proponimus confidenter, memorati regis precibus fiducialiter adjicimus preces nostras, non indigne sperantes quod preces addite precibus, incunctanter obtineant, quod altere sine cunctationis dispendio verisimiliter obtinerent. Quocirca universitatem vestram monemus, rogamus et hortamur attente, per apostolica vobis scripta precipiendo mandantes quatinus, pensato prudenter quantum ordini vestro consulitur, si nobis in hiis que benigne petimus, prompte parendo, nos ad favoris et beneficiorum erga vos et eundem ordinem vicissitudinem provocatis, si memoratum regem, quem in relevandis vestris necessitatibus multa propitiatione benivolum, et in utilitatibus promovendis benivolentia magna propitium hactenus habuistis, studeatis in futurum erga vos et eundem ordinem in benivolentie solite continuationem servare, hujusmodi nostra et ejusdem regis beneplacita efficaciter adimplentes, eundem fratrem constituatis generalem ejusdem ordinis in regno Francie preceptorem, hujusmodi preceptorie officium per vestras patentes litteras, quas ei, sublato cujuslibet dilationis et contradictionis obstaculo, infra tres menses post receptionem presentium, destinari volumus et rogamus, committentes eidem, mandatis apostolicis ac nostris et ipsius regis precibus taliter parituri, quod vestre obedientie promptitudo vobis apud nos et eundem regem augmenta favoris pariat, apostolice ac regalis gratie nutrimenta producat, hujusmodi partum nutriendo multiplicet et nutritum multiplicando conservet. Ut autem vobis patulo pateat nobis fore plene votivum ut nostra et ipsius regis vota in hac parte celeriter impleantur, venerabili fratri nostro .. patriarche Jerosolimitano, per litteras nostras injungimus, ut vos ad id sollicite moneat et inducere studiose procuret, devotionis vestre quam speramus promptitudinem rescripturus. Datum Urbemveterem, II idus martii, anno tertio.

In eundem modum .. patriarche Jerosolimitano, apostolice sedis legato. Habet universalis ecclesia etc., ut in superiori, verbis competenter mutatis, usque committentes eidem. Quia vero nobis cordi est ut nostris et ejusdem regis beneplacitis in hac parte celeriter satisfiat, fraternitatem tuam monemus et hortamur attente, mandantes quatinus dictos magistrum et fratres ad id monere sollicite ac efficaciter inducere studiose procures, eorum quam in hoc desideramus obedientie promptitudinem quantocius rescripturus. Datum ut supra.

In eundem modum eidem patriarche. Habet etc., ut in secunda usque studiose procures. Quod si forsan memorati magister aut fratres in predictis desides vel negligentes, contradictores fuerint vel rebelles, tu ipsis auctoritate nostra inhibere procures, ne ad dictum officium quemquam eligere, vel in ipso aliquem instituere aut illud alicui conferre, seu de ipso contra mandati nostri tenorem quomodolibet ordinare presumant. Nos enim decernimus irritum et inane, si secus contigerit attemptari. Ceterum, si aliquis contra predictorum mandati, inhibitionis et decreti tenorem, se in officium predictum intrudere aut illud occupare vel tenere presumpserit, ab hujusmodi presumptione ipsum per censuram ecclesiasticam, appellatione cessante, compescas. Nichilominus magistro et fratribus memoratis injungens quod hujusmodi presumptorem pro preceptore habere, vel ei velut preceptori obedire, aut ipsum tamquam fratrem admittere, vel illi communicare in aliquo non presumant. Contradictores etc., non obstantibus contrariis consuetudinibus vel statutis ejusdem ordinis, juramento, confirmatione sedis apostolice vel alia firmitate vallatis, et quibuscumque privilegiis, indulgentiis vel litteris, sub quacumque verborum forma quibuscumque concessis, per que presentium effectus impediri valeat vel differri, seu si aliquibus est ab eadem sede indultum quod interdici, excommunicari nequeant vel suspendi per litteras apostolicas, non facientes plenam et expressam de verbo ad verbum de indulto hujusmodi mentionem. Et insuper denuntietur eisdem quod, si super premissis nostris obedire mandatis et preces dicti regis exaudire contempserint, nos illis vocem virtutis dabimus et effectum, et preter indignationem regis quam non indigne propter obauditionem precum suarum incurrent, erga se affectum nostrum, effectu docente, sentient immutatum. Datum ut supra.