Schillmann 1418

Eidem.

Cum te ad partes Alemannie pro bono earum statu et Ecclesie ac Imperii negotio promovendo de fratrum nostrorum consilio destinemus, discretioni tue ut generaliter per totam terram tue legationis de personatibus, canoniis, prebendis aliisque beneficiis ecclesiasticis, sive curam habeant sive non animarum annexam, idoneis personis secundum quod expedire videris providere, ac injungere quod recipiantur in ecclesiis ejusdem legationis in canonicos, et de prebendis vel dignitatibus, seu aliis beneficiis, si vacant, alioquin quamprimum vacaverint, provideatur eisdem et contradictores super hoc per censuram ecclesiasticam appellatione postposita cohercere libere valeas, statuto de certo canonicorum numero et quibuslibet aliis, necnon quibuscumque consuetudinibus ecclesiarum tam cathedralium quam aliarum ejusdem legationis, juramento vel quacumque alia firmitate vallatis, seu si eedem ecclesie sint auctoritate Sedis Apostolice vel legatorum ipsius super aliorum provisione gravate, vel si forte ab eadem sede indulgentiam habeant quod earum prelati sive capitula minime teneantur seu compelli non possint ad aliquorum provisionem, quodque interdici, suspendi vel excommunicari non valeant absque speciali Sedis Apostolice mandato, plenam faciente de indulgentia hujusmodi mentionem, et quibuslibet aliis apostolicis indulgentiis, per quas super hoc possent forsitan se tueri, aut si etiam prefate persone alias beneficiate fortassis existant, seu litteris nostris venerabili fratri nostro .. episcopo Cameracensi directis, in quibus dicitur contineri ut si quando in regno sive legatione Alemanie aut ducatu Brabantie vel vicinis partibus super aliquorum provisionibus direximus, vel nos contigerit litteras destinare, nisi de civitate ac diocesi Cameracensi expressa fiat mentio in eisdem, nostre intentionis existit ut hujusmodi littere necnon et providendi potestas a nobis concessa legatis Sedis Apostolice ad easdem civitatem et diocesim nullatenus se extendant, nequaquam obstantibus, auctoritate presentium duximus concedendum. Dat. Laterani, XV kalendas maii, anno XI°.