Schillmann 1044

Dilectis filiis consulibus castri Lemovicensis.

Prolixa litis dilatio, pacis emula, nutrix discordie, commodi parca, larga dispendii, judicialis gladii ictum non sine litigantium jactura multiplici et gravi justitie lesione suspendit, exactrix quidem sumptuum et laborum extortrix sic rei veritatem multiplici confusione processus involvit ut vix postmodum adhibita etiam attentionis manu sollicite valeat explicari; propter quod sepius litigantes post expensas inutiles et labores inanes dampnum sustinent sui juris. Unde Sedis Apostolice providentia illud circa causarum strepitus quantum est in ipsa moderantie studium adhibet, ut prorogationis detrimento vitato post debite ventilationis examen vel juste mucrone sententie decidantur, aut amicabili sopiantur concordia, seu etiam meta ipsis equa provisione figatur, quatinus partium parcatur sumptibus, quieti provideatur earum, et cuique jus suum integre conservetur. Sane, cum inter bone memorie Durandum episcopum Lemovicensem ex parte una, et vos ex altera, super eo quod predictus episcopus occasione cujusdam maleficii perpetrati in ecclesia castri de Breno, Lemovicensis diocesis, in vos excommunicationis sententiam promulgarat, questio verteretur, nos tandem dilectum filium nostrum G. sancti Eustachii diaconum cardinalem in causa hujusmodi concessimus auditorem, qui visis et intellectis rationibus utriusque partis et diligenter meritis ipsius cause discussis, quia non invenit sententiam ipsam pro manifesta offensa, sicut procurator dicti episcopi objecerat, fuisse prolatam, eam de speciali mandato nostro sententialiter relaxavit, decernens dilectum filium Aymericum electum Lemovicensem, qui predicto episcopo viam universe carnis ingresso fuit exceptionem objectam a procuratore ipsius episcopi prosecutus, ad resarciendum expensas vobis ex objectu exceptionis illius, cum idem electus eam non objecerit, non teneri. Nos igitur vestris supplicationibus inclinati sententiam cardinalis ejusdem ratam habentes, ipsam auctoritate apostolica confirmamus et presentis scripti patrocinio communimus, tenorem ejusdem de verbo ad verbum presentibus inseri facientes, qui talis est:

Universis presentes litteras inspecturis Guillelmus miseratione divina Sancti Eustachii diaconus cardinalis salutem in Domino. Noverit universitas vestra quod, cum in causa que inter bone memorie Durandum episcopum Lemovicensem ex parte una, et consules castri Lemovicensis vertebatur ex altera super eo quod predictus episcopus occasione maleficii perpetrati in ecclesia castri de Breno in consules ipsos excommunicationis sententiam tulerat, nos dominus papa concesserit auditorem, quia visis et intellectis rationibus utriusque partis, et meritis cause diligenter examinatis, sententiam ipsam non invenimus pro manifesta offensa in consules predictos prolatam, sicut objecerat procurator episcopi memorati, idcirco eam de speciali mandato sententialiter relaxamus, et dominum Aymericum electum Lemovicensem, qui, predicto episcopo carnis debitum exolvente, est exceptionem objectam a .. procuratore ipsius episcopi prosecutus, ad resarciendum expensas parti adverse ex objectu exceptionis illius, cum idem electus eam non objecerit, dicimus non teneri. In cujus rei testimonium presentes litteras inde fieri fecimus, et sigilli nostri munimine roborari. Actum Lugduni, die lune proximo post festum exaltationis Sancte Crucis, anno Domini M°CC°XLVI.

Nulli ergo, etc., hanc paginam nostre confirmationis infringere, etc. Si quis autem, etc. Dat. Lugduni, nonis octobris, anno quarto.