Walt4 Text

B. Walter von Orléans an den Klerus von Auxerre vor Mitte 887

Text nach Bischoff (Bi) S. 129 f. und Hs.

Eximiis patribus ac dilectissimis in Christo fratribus Autissiodorensis[1] ecclesiae filiis Valterius[2] divina favente clementia episcopus aeternam perpetuę felicitatis coronam fideleque servitutis obsequium.

Vestram totis inploramus viribus almificentiam nostri nostrorumque[a] in vestris sacrosanctis[b] iugiter recitare memoriam scientes indubitanter, quia amor vester, quo rapimur indesinenter, nos erga vos benivolos nectitur atque fideles. Denique cognoscentes vos pastorali desolatione flebiliter merentes[3], fraterna caritate tacti, his nostre exiguitatis consolari dignum duximus litterulis, hortantes, quamvis modica nostre humilitatis sapientia[c] nil consilii vestre eximie possit addere prudentie, ut in hac praesenti mestitia vester non deficiat animus, sed semper in illo indissolubiliter fundatus existat, qui est praesens merentium consolatio, quoniam is mediator dei et hominum homo Christus Iesus, quique est futurorum bonorum a deo pontifex institutus, vos quantotius efficiat[d] pastorali patrocinio letantes. Oportet tamen, ut vos interim caritas deo beneplacita concordes faciat ac bene vivendi normam non deserat. Praeterea vestra noverit prudentia imperiali[4] serenitate litteras nostrę delatas esse notitię Teutberto[5] monaco Autissiodorensis ecclesię se regimen credidisse, quem tanto animarum deposito indignum considerantes monendo suggerimus[e], ut nequaquam hunc vestra electio vobis praeficiat. Sed huiuscemodi virum elegite, [qui][f] vobis divino fultus opitulamine in sua amministratione non praeesse diligat, sed prodesse.